Қазақстандық кәсіпқой боксшы Қанат Ислам Алаш жұртын тағы бір мәрте қуантты. Алматыда өткен бокс кешінде батырымыз ганалық қарсыласы Патрик Аллотейді 12 раундта басымдылықпен жеңді.
12 раундқа жоспарланған жекпе-жекті қос боксшы да аса сақтықпен бастаған болатын, алғашқы раундты екеуі бір-бірінің осал тұсын аңдаумен өткізді. Екінші раундтан бастап Қанат шабуылға шықты. Патрик Аллотей де өзінің тәжірибелі боксшы екенін көрсетіп бақты. Әсіресе Қанаттың шабуылдағы айла-тәсілдері мен соққылары дөп тиді. Десе де Патрик Аллотей төзімділік танытып, “Қазақтың” қарымына тойтарыс беруге тырысты. Нәтижесінде Қанат Ислам 117-112, 116- 112, 116-112 есебімен жеңіске жетті.
“Улы жебе” деген лақап атқа ие ганалық боксшыны жеңген Қанат “Қазақ” Ислам бірінші орта салмақта “WBA Fedelatin” және “WBO Intercontinental” чемпиондық белбеулерін өзінде сақтап қалды.
Қанат Ислам осы уақытқа дейін 21 кездесу өткізіп, барлығында жеңіске жеткен. Оның 18-ін нокаутпен ұтқан.
Айта кетейік, Алматыда өткен бокс жекпе-жектерінде қазақстандық боксшылардың барлығы жеңіске жетті. Жұман Жұмабеков беларусь боксшысы Владимир Ивановты бірінші раундта ұтса, Айдар Шәрібаев испандық боксшыны 6 раунд қорытындысы бойынша жеңіп шықты. Али Ахмедов әзірбайжандық Али Маммедовтан бірінші раундта айласын асырса, Руслан Мырсатаев ганалық Наху Азумиды жылдам жер жастандырды. Жанқош Тұраров салмақ өлшеу рәсімінде сес көрсеткен қарсыласы Айсак Ариені төртінші раундта айқын жеңіп шықты. Жәнібек Әлімханұлы кәсіпқой бокстағы қадамын сәтті бастап, 2010 жылы Геннадий Головкинмен жұдырықтасқан колумбиялық Милтон Нуньесті бірінші раундта нокаутпен жеңді.
Қанат Ислам мен Патрик Аллотейдің толық видеосы
