Семейдегі Мұқан Төлебаев атындағы музыкалық училище – қазақ өнеріне қолтаңбасын қалдырған қаншама өнер тарландарын тәрбиелеген қарашаңырақ. Жарты ғасырдан асқан трихы бар осынау оқу ғимараты әлдекімдердің көңіліне «түрлі ой» салған.
Біздің қазіргі «реформашыл» басшылар айтулы оқу орнының ғимаратын басқа мақсатқа пайдалану жөнінде сырттай шешім де шығарып қойған. «Сырттай шешім» дейтініміз, шешім иелері бұл мәселе жөнінде училище ұжымымен алдын ала кездесіп, түсіндіруді қажет етпегені байқалады.
Осыдан 1 айдай уақыт бұрын Шығыс Қазақстан облысының білім басқармасы тарапынан М.Төлебаев атындағы училищені қаладағы «Бизнес» колледжіне қосып, босаған ғимаратты колледж студентеріне жатақхана жасау туралы қатынас қағаз келіп түскен. Төбелерінен жай түскендей болған училище ұжымы содан бері жанұшырып біраз мекеменің есігін қаққан. Облыстық білім басқармасына, оларды үстінен тікелей қарайтын облыс әкімінің орынбасары Жақсылық Омарға дейін барып мән-жайды түсіндіруге тырысқан. Жанайқайларына жарытымды жауап болмаған.
Оқу орнында еңбек ететін 160 тай адамның қолы қойылған хатта мәселе орынды көтеріліп, ұғар құлаққа жеткілікті дәлелдер айтылыпты. Атап айтқанда, жаңадан ұсынылған колледж ғимараты қазіргі ғимараттағыдай музыка мамандарын тәрбиелеуге қолайсыз. Әр пәнді қойып, әр өнерпаз студентпен жеке жұмыс істейтін арнайы кабинеттер әлі қарастырылмаған. Кабинеттар тауып бергеннің өзінде ғимаратты басына көтеретін аспаптар үнін келесі мамандықта білім алып жатқан қауым жақтыра қояр ма екен. Оның соңы екі ұжымның арасында түрлі түсінбеушілікті тудырмасына кім кепіл? Ол бір. Екіншіден, қолданыстағы 11 рояль мен 84 фортепиано ары-бері тасымалдауды көтермейді. Алдына 30-40 жыл болған аспаптарды орнығып қалған орнынан қозғау оларды істен шығаруға әкеліп соғуы мүмкін. Бұл рояльдар кезінде арнайы кранмен егізіліпті. Осы ғимараттың тұрақты температурасына қалыптасқан аспаптар басқа жерде бұрынғыдай дыбыс шығармайды дейді музыка мамандары. Олардың бұлай алаңдайтын себептері қазіргі ұсынылған колледждің қыс кезінде өте салқын болатынынан әбден хабардар. 1 рояльдың құны 30 000 АҚШ доллар болса, 1 фортепиано 10 000 АҚШ доллары тұратындықтан бұл аспаптарды сүйрелейміз деп бүлдіріп алсақ, екі есе шығын екенін де жеткізуге тырысқан.
Алайда, тырысқанмен әзірге құлақасқан басшы табылмай тұр. Өздері тікелей бағынышты облыстық сала басшылығының жауабына көңілі томаған училище директоры Серік Малаев оқу орынын орнында қалдыру туралы ізденісін әлі де жалғастыра түсуге бекініп отыр. Тіпті, директорлық қызметінен алып тастаса да алған бетінен қайтпақ емес. Себебі, Әмiре Қашаубаев, Жүсiпбек Елебеков, Бекен Жылысбаев, Бибiгүл Төлегенова, Еркеғали Рахмадиев, Роза Рымбаева, Жолан Дастенов, Мырзағали Айдаболов, Темiржан Базарбаев, Секен Тұрысбеков, Мәулiт Рахымбаев, Дауыл Қайроллин, Олег Джанияров, Тұрсынғазы Рахимов секiлдi ел мақтанышына айналған өнер тарландарының ізі қалған қарашаңырақты тарихи қалпында сақтап қала алмау бір біз үшін ғана емес, ел басқарып отырған жауапты басшылар үшін де үлкен сын болмақ дейді училище диреткоры.
Бүгінгі күнде Бибүгіл Төлегенова, Роза Рымбаева, Жұпар Ғабдулина, Медет Шотабаевтай даңқты әншілеріміз де облыстың бұл шешіміне алаңдаушылық танытып, өз тараптарынан әрекетке жасауда. Нәтиже болатын-болмайтынын әзірге белгісіз.
«Жерұйық» — ақпарат.
