Тумысынан қылышы мен мылтығын асынып жүруге құмартатын ұл бала жетіле келе осы жолға мықтап бекінетіні ақиқат. Бала кезден, кейін мектеп қабырғасында да Отанды сүюге, патриоттық рухта, батылдық пен батырлыққа үйретеді. Соған баулиды. Одан бала күнгі арманы, атасы мен әкесінің әскердегі суреттерін көріп сырбаз жігіт сарбаз атануға ұмтылады. Уақыт талабы да сол жолға жетелейді.
Азат елдің айбынды әскері қатарын толықтыруда. Әскерге шақыртудың күзгі маусымы басталды. Алаштың ары мен намысын мәңгі қорғауға ант беретін сарбаздар нық басып сапқа тұрмақ. Күзгі шақырту науқанының беталысын білу мақсатында аудандық қарулы күштер қызметкері Аида Дүйсекинамен әңгімелескен болатынбыз.
– Ел Тәуелсіздігіне ширек ғасырдан асты. Осы жылдардың жетістігі болар, еліміздің айбынды әскері бар. Бұл да тәуелсіздіктің жемісі. Айбынды әскеріміздің беделді қызметі бәрінен де биік тұр. Әскери қызметке шақырту жұмыстарына тоқталсақ, 2017 жылдың күзінде Қазақстан Республикасының Қарулы Күштеріне, басқа да әскерлері мен әскери құрылымдарына 1999-1999 жылдар аралығында туған 16 мың азаматты әскер қатарына шақыру жоспарланған. Қазақстан Республикасының 2012 жылдың 16-шы ақпандағы «Әскери қызмет және әскери қызметшілердің мәртебесі туралы» Заңына, сондай-ақ Қазақстан Республикасы Президентінің 2017 жылдың 16-шы наурызындағы № 449 «Әскери қызметтің белгіленген мерзімін өткерген мерзімді әскери қызметтегі әскери қызметшілерді запасқа шығару және Қазақстан Республикасының азаматтарын 2017 жылдың наурыз-маусымында және қыркүйек-желтоқсанында мерзімді әскери қызметке кезекті шақыру туралы» Жарлығына сәйкес, Қазақстан Республикасының Қарулы Күштерін, басқа да әскерлері мен әскери құрылымдарының әскери бөлімдері мен мекемелерін жинақтау үшін 2017 жылдың күзінде жас әскермен толықтыру мақсатында, ағымдағы жылдың 2-ші қыркүйегінен бастап Республикада шақырту және медициналық комиссия өз жұмысын бастады. Желтоқсан айының соңына дейін жалғасады, – дейді А.Дүйсекина.
Әскер қатарына шақырылған жас жігіттердің, жалындағын ұландардың ата-аналарымен сұхбат, түсіндірме жұмыстары жүргізіледі. Бұл да болса баласынан бір жылға жырақтайтын ата-аналардың кеудедегі жалындаған қорқынышы мен үрейін, сенімсіздігін сейілтуге қажет-ақ. Биылғы жылғы күзгі шақыртуда аудан бойынша 51 адамды әскер қатарына жіберу жоспарланған. Жоспар анық. Жұмыс жүйелі.
– Күзгі шақырту бойынша қарулы күштер қатарына белгіленген жоспар – 20. Бүгінгі күнде ауданымыздан 5 азамат қатарға аттанды. Ал, шекара қызметіне жоспар 10 азамат болса, бұл жоспар артығымен орындалып, 14 сарбаз шекара шебінде тұр. Сондай-ақ, аудан бойынша президенттік гвардияға 1, ұлттық гвардияға 20 азамат жіберу жоспармен бекітілген, – дейді Аида Дүйсекина.
Аудандық қорғаныс істер қызметі бүгінде әскер қатарында абыройлы қызмет атқарып келген жас сарбаздарымен мақтанады. Отан алдындағы борышын аса бір құштарлықпен, аса зор мәртебемен атқарған талай жастар лайықты төсбелгілермен марапатталып, аудан абыройын асқақтатты. Солардың қатары тағы бір мәрте толықты. Жақында Атырау қаласы 2016 әскери бөлімінде борыштарын өтеп келген ефрейтер Жәнібек Мамиұлы мен Қуаныш Құдабай ІІ дәрежелі шекара қызметінің үздігі төсбелгісімен марапатталды. Майқайыңдық марқасқа ұландар құрметті қызметі арқылы айбынымызды асқақтатты.
Әлия ТАУКЕНОВА.
Баянауыл
