Маусым айының 16 күні Семей қаласының Шәкәрім атындағы мемлекеттік университетіне Астана қаласынан бастау алып, Ресейге бағыт алған керуен келіп тоқтады. Лев Гумилев атындағы Еуразия Ұлттық университетінің ұйымдастырыуымен ҚР тәуелсіздігінің 25 жылдығына арналған «Алтай мұрасы» атты халықаралық автокеруеннің құрамында Еуразия ұлттық университетінің ректоры Сыдықов Ерлан Бәтташұлы, Елтаңба авторы Мәлібеков Жандарбек Мәлібекұлы, белгілі ақындар Дәулеткерей Кәпұлы мен Дүйсенғазы Серікзат болды. Алғашқы болып сөз бастаған Шәкәрім атындағы мемлекеттік университетінің ректоры Ескендіров Мейір Ғариполлаұлы Шәкәрім университетінен жеткен жетістіктері туралы мақтанышпен айта келіп, келген қонақтардың бұл сапары университет тарихында алтын әріптермен жазылатынын жеткізді. Бұнан кейін сөз алған Ерлан Бәтташұлы «Алтай мұрасы» экспедициясының негізгі мақсатымен таныстырып, Еуразия ұлттық университетінің 20 жылдық мерейтойының қарсаңындағы бұл шараның мәні зор екенін жеткізді. Сонымен қатар биылғы жылғы маусым айының ҚР-ның рәміздеріне арналуына байланысты елтаңба авторы Мәлібеков Жандарбек Мәлібекұлының қолы қойылған Елтаңба символы университетке салтанатты түрде табыс етілді. Келген қонақтар ізгі тілектерін білдіріп, ақындар жыр жауһарларымен сусындатты.
Шара түстен кейін жиналыс түрінде жалғасты. Кеш барысында Ерлан Бәтташұлына көкейтесті сұрақтар қойылып, профессор Арап Сіләмұлы бастаған игі жақсылар сөз сөйледі. Еліміздің дүлдүл ақыны Серікзат Дүйсенғазы «Ауылым менің» деп өлеңнен өрім өрді. Кеш барасында Ерлан Бәтташұлына Шәкәрім университетінің құрметті профессоры атағын беріп, шапан жапты.
Сыдықов Ерлан Бәтташұлы Тарих ғылымдарының докторы, профессор, Халықаралық педагогикалық білім беру ғылымдары академиясының академигі, Лев Гумилев атындағы Еуразия ұлттық университетінің ректоры, 400-дей ғылым және ғылыми көпшілік еңбектің, соның ішінде Англияда, Қазақстанда, Ресейде, Түркияда басылған монографиялық еңбектердің, сөздіктер мен энциклопедиялардың авторы болып табылады. Өлкетану жөніндегі зерттеулерді бір жүйеге келтірген. Алаштану және Шәкәрімтану ғылыми бағыттарының негізін қалаушылардың алдыңғысы болады. Парасат және Екінші дәрежелі барыс ордендерінің кавалері, Қазақстанның еңбек сіңірген қайраткері. Ш. Айтыматов атындағы халықаралық сыйлықтың иегері, ҚР мерейтойлық медальдарымен марапатталған.
Кеш соңы келген қонақтардың университетке, Семей халқына деген жүрек жарды тілектерімен және Ресейге аттанғалы отырған экспедицияға ақ жол тілеумен аяқталды.
Айнұр ТАҢЖАРЫҚҚЫЗЫ
