Әуелі «Жерұйық» сөзінің түп-төркіні не деген сауалға жауап берейік. Бағзыдан қалған аңыздарда Асан қайғы Желмаяға мініп, жиһан кезіп, шұрайлы мекенді, көгорай шалғынды, сулы жер, қой үстіне бозторғай жұмыртқалайтын қоныс іздейді. «Елді сол жерге қоныстандырсам!» – деп, арман етеді. Ендеше, бұл порталдың «Жерұйық» деп аталуы – ұлттың күре тамыры һәм басты байлығына айналған бейбіт елдің берекесін айқындап тұр.
Екіншіден, “Жерұйық” порталы – Абай айтқан «бес асыл істі» бойына жиған жалынды жастарға мол мүмкіндік береді. «Бұлақ көрсең – көзін аш» деп дана халқымыз айтқандай, жастардың шығармашылық қабілеттерін шыңдап, ой- өрісін дамытуға арналған ашық алаң десек те болғандай.
Үшіншіден, сол жастардың істері ілгері жүріп, жұмысы оң баға алып жатса, «Жерұйық» сайтының арнайы сый-ақысын алады. Бұл тек қана Шығыс Қазақстан емес, күллі Алаш еліне қол жетімді бастама.
Төртіншіден, порталда өмірге мән, көңілге нәр себетін деректі фильмдер, мағыналы кинолар көрсетіледі.
Бесіншіден, блогерлердің бір-бірімен әңгімелесуіне мүмкіндік бар. Сол арқылы жақын танысып, сайттың дамуына өз үлесін қосады.
Алтыншыдан, қазіргі таңда сапалы қазақ сайттары аз болып тұр. Ал сапалы сайттар көбею үшін «жан аямай еңбек қылу керек». Біздің сайт – ащы болса да ақиқатты айтуға құштар ұлт жанашырларының қолайлы мекені десек, қателеспеспіз.
Жетіншіден, «Қараңғы қазақ көгіне, Өрмелеп шығып Күн болам!» деген Алаш арыстарының арманын орындауға біздің портал барын салады.
Ұлттық рухын, қасиетті дінін, қастерлі тілін, жұпарлы жерін, қоғалы көлін, ашық аспанын, тасқа жазған дастанын құрметтеген біздің порталға қосылыңыздар, ағайын!
“Жерұйық” блогері
