Жетпісті жетегіне алған Серік Мусиннің мерейлі мерейтойы өзі талай жылдар тер төгіп, еңбек еткен шаңырақта, Қаныш Сәтбаев атындағы мемориалды мұражайда аталып өтті. Азамат. Бұл ұғымның парқын адамгершілігі мол, еселі еңбек сіңірген адам дейді аңдағандар. Тұла бойынан тектілік аңғарылып тұратын асыл да ардақты ер, қазыналы қария Серік Мазанұлы азамат деген атқа әбден лайық.
Қаз қаңқылдап жазды шақырса, қарға қарқылдап қысты шақырады. Ғұмырдың да кәрілік атты алтын күзі келеді. Оны ешкім де тоқтата алмақ емес, дөңгеленген табиғат заңдылығы осы. Қазақтың елдік таным-түсінік ұғымында адамның қартайған шағын білдіретін «қария», «қарт», «шал» деген жалқы да жалпы атаулар бар. Бұлардың мәртебелік дәреже-деңгейі әр түрлі. Ауыл сыйлысын адамдар «қарт», «шал» деп атамайды. Шын мәніндегі елге сыйлы, жұрт сыйлайтын адам ғана «қария» деген атауға лайық. Олай болса, Серік Мусин – біздің ортақ қариямыз. Жаны жақсы жандар байлық жинамайды, өздері байлыққа айналарын ескерсек, Серік Мазанұлының кескін-келбеті, адамгершілік тұлғасы, салиқалы сөзі мен тарихқа, қазақы болмысқа деген адалдығы мен жанашырлығы тұнған байлыққа пара-пар.
«Кепілсіз дүние келісім таппайды. Онсыз табиғат табиғи болмысынан, таным-тағылымынан, өмір пендешілік тіршілігінен саяқтанады, яғни сұрқай тартады. Біз сол келісімін тапқан табиғи құбылыстарды танып, өткеннің тәлімін бойымызға сіңіріп, сол парызды келешек күндердің кепіліне береміз. Өмір сүруінің өзі құбылыс ретінде танылған әр тұлға – ұлт руханиятының кепілі». Тұрсын Жұртбайдың осы бір өрелі сөздерінен Серік ағаның да кепілдік келбетін аңғаратындаймыз.
Торқалы тойға Серік ағаның замандастары мен қызметтес болған әріптестері жиналды. Алғашқы құттықтау сөзді облыстық мәдениет, архивтер және құжаттама басқармасының атынан келген өкілі, кезінде Серік ағамен қызметтес болған Қайырбек Сартайұлы бастады. Академик Қаныш Имантайұлының мұрасын насихаттау жолында көптеген жылдар бойы ерен еңбек еткен Қазақстан Республикасының мәдениет қайраткерінің тұлғалық даралығы мен даналығын сөз еткен Қайырбек Сартайұлы мерейтой иесіне, қазыналы қарияға балаларының бақытын тіледі.
«Көңілі өсіп мейманасы асқан адам кәрілікті мойыңдамайды» дейді Шал ақын. Серік ағаның сырбаз тұлғасына қарап оны қарттыққа қимайсың. Шынайы достар мен адал қызметтестерінің арасында марқайып, масаттанып отырған келелі кездесу, мерейі үстем жиында өткен күннің естеліктері де сөз болды. Торқалы тойда Серік Мазанұлының қызметтес, әріптестері жылы лебіз, ыстық ықыластарын білдіріп, сыйлықтарын тарту етті.
Қазақ елінің ғана емес, дүниежүзінің феномені – Қаныш Имантайұлындай аты алты алашқа мәлім, ғұлама перзентті дүниеге келтірген киелі Баянауыл топырағы қасиетті. Қазақ халқы ғана емес, әлем халықтары мойындаған ірі тұлғаның Баянауылда орналасқан мемориалдық мұражайы – халыққа рухани азық болар мәдени ошағы болып табылады. Мұражайдың көркейіп, жәдігерлермен, тың деректермен толығуы жолында еңбек етіп, жанашырлық танытқан бүгінгі мерейтой иесі Серік Мазанұлы қашанда ұлтының баяндылығы мен ұрпағының амандығын тілейді. Біз де өз тарапымыздан асыл азаматқа денсаулығының күйлі-қуатты, ғұмырының ұзақ, көрер қуанышының мол болуын тілейміз! Мерейіңіз үстем, қадыр-қасиетіңіз зор болсын.
Әлия ТАУКЕНОВА,
Баянауыл.
