Бүгін Семейде «Ұлы даланың ұлы аналары» тақырыбында ғылыми-тәжірибелік конференция өткен болатын. Негізгі тақырып Ұлы Абайдың әжесі Зереге арналғанымен баяндамашылар Зере әже болмысын сипаттай отырып, жалпы қазақ аналарының қадір қасиетін паш етті. Құнанбайдай тұлғаға ана, Абайдай данышпанға әже болған қазақ әйелінің қайраткерлік қыры «Құнанбай» киносында сәтті сомдалғаны да айтылды. Конференция мақсатын Семей қаласының Шәкәрім атындағы мемлекеттік университетінің ректоры Мейір Ескендіров: «Ұлт аналарын ұлықтап, олардың ұрпақ тәрбиесі мен ел мүддесіне қосқан өнегелі үлесін, алтын құрсақ аналардың асқақ келбетін қазіргі ұрпақ санасына сіңдіру, сол арқылы жаңа қоғам жастарын тәрбиеге шақыру» деп айқындай түсті. Сонымен бірге, Мейір Ғарифоллаұлы конференция қонағы «Құнанбай» фильмінің режиссері, Қазақстанның халық әртісі, Мемлекеттік сыйлықтың иегері Досхан Жолжақсыновқа «Семей қаласының Шәкәрім атындағы мемлекеттік университетінің құрметті профессоры» атағы табысталатынын жеткізді. Университет ректоры: – Досқан ағамыздың қазақ киносына қосқан үлесі ерекше. Осы конференция тақырыбына сай айтатын болсақ, ол – Абайдың әжесі Зеренің де образын жасап шықты. «Құнанбай» фильмі 5-11 қыркүйек аралығында Қазанда өтетін ХІІ Қазан халықаралық мұсылман киносы фестиваліне қатысқалы жатыр. Сізге және қазақ киносына ақ жол тілейміз, – дей келе режиссер-атерге профессор атағын табыстады. Жұрт алдында тебірене сөз сөйлеген Досхан Жолжақсынов: – Біз енді әртіспіз, режиссерміз, жалпы өнер адамы болған соң мақтағанды, марапаттағанды теріс көрмейміз. Десе де, мақсат, мүдде, ұлт, парыз деген дүниелер бірінші орында тұрады. Құнанбай образы менің өмірімдегі ең қиын рөлім болды. Себебі, әртісті қинайтын эпизодтар кездесті. Сонымен қатар, өзім режиссер болғандықтан барлық әртістің киімінің түймесіне дейін назарда ұстап жүруім керек қой. Кино шыққан бетте Елбасы да сіздер сияқты алғысын айтып жатты. Киноның сәтті шығуын өз басым Құнекеңнің қасиеті деп білемін. Қазақтың данышпандығы деп санаймын,-деп көпшілікке алғысын айтты.

zheruiyq.kz

Қазақ киносы