1996 жылдың 3-ақпанында Шығыс Қазақстан Облысы Тарбағатай ауданы Үштөбе ауылында дүниеге келген.
Бірнеше мәрте Абай оқуларының жеңімпазы. Өлеңдері аудандық «Тарбағатай», «Ұстаз үні» газеттері мен облыстық «Ертіс өңірі» газетінде жарияланды.
МАХАМБЕТКЕ МАДАҚ ЖЫРЫ
Қара қазан сары бала қамы үшін,
Найзаладың Нарынқұмның намысын.
Жер қайысқан қол ертіп,
Қол ерткен соң мол ертіп,
Ауызыңды Айға білеп,
Жауға аттандың арысым.
Атаңа нәлет әр патша,
Жігеріңді жонды да,
Азамат ердің баласын,
Аттандап атқа қондырып,
Көмейіңнен жыр төктің,
Көкейіңнен күй төктің,
Ол да бізге мол мұра,
Бір қолыңда көк найза,
Бір қолыңда домбыра!
Ақырып теңдік сұрады,
Дауасын тауып дертті елдің.
Шегінбеуге бір адым,
Семсер ұстап серт бердің.
Бостандық еді мұратың,
Жалын болдың, өрт болдың.
Әділетсіз хандардың,
Қарны жуан билердің,
Түн ұйқысын төрт бөлдің.
Батырлық біткен тегіне,
Кек қосылып кегіне,
Исатаймен қол бастап,
Қараша жұртты қорғаштап,
Бекем болдың бегіңе.
Қорамсаққа қол салып,
Азаттық үшін жар салып,
Емірендің егіле.
Күн болып шықтың өрмелеп,
Қаһарлы қазақ көгіне!
Махамбет болып жырласам,
Рухымды да бір білер,
Мен қазақ дейтін ұрпағың,
Қаламынан Күн күлер!
Келешектегі даналар,
Алтын құрсақ аналар,
Аман болса мәңгілік,
Махамбет туар, кім білер?!
ДАУАСЫЗ ЖҮРЕК
Дауасыз жүрек!..
Соғады қалай?!
Желпініп күнде,
Жоғары қарай.
Кең тартқан кеуде, тынысы тәтті,
Бақытын күтер…
Жоқ әлі талай!..
Дауасыз жүрек!
Амансың әлі,
Қиналма олай,
Барарсың әрі.
Көңілсіз мына қоғамды көріп,
Қарызға болсын,
Аларсың дәрі.
Дауасыз жүрек!
Ауырған талай,
Қайыса қоймас,
Қабырғаң қалай?!
Онсыз да мына тірлікке қарап,
Салып отырған
Сабырдан сарай!
Дауасыз жүрек!..
Шыдарсың бәлкім…
Жұбанышың жоқ,
Жыларсың әр күн.
Қуанышың жоқ, қайғың да жетер,
Есепсіз емін
Сұрасын әркім!..
Жүрекке керек,
Жағатын жас ән,
Телмірткен мені тағатым – осы ән.
Дауасыз жүрек,
Алысқа бармай,
Тоқтап қалатын сағатың қашан!..
