Белгілі журналист, белсенді блогер Жолымбет Мәкіш ФБ парақшасында қара көз қарындастарының маңдайынан неге иіскейтінін ашып жазды,-деп хабарлайды “Жерұйық” тілшісі.
“Қарға” десем, осындағы біреулер “қарға емеспін” деп ренжиді. Қазақтар жақсы көргенін ғана “қарғам” деген ғой, қарағым… Беттен де шөпілдетіп сүймеген. Маңдайынан ғана иіскейтін. Кейбір қарындастарымның маңдайынан иіскейтінім (біліп жүріңіздер) содан. Ол деген – ұлттық өнеге…,-деп қысқа да нұсқа қайырған Жолымбет Мәкіш оқырмандарына салмақты ой тастады.
Жалпы, қазақта “қалқам”, “қарғам”, “шырақ”, “сәулем”, “айнам” атаулы (қаратпа мағынадағы) сөздер көбінесе көңіл-күйдің мерейлі, мейірімді, қамқор екенін білдіреді. Бұл қазақтың өлең-жырлары мен әндерінде көптеп кездесетінін байқаймыз. Мысалы, Мұқағалидың “Келші, қалқам, шашыңнан иіскейін” өлеңін баршамыз жақсы білеміз. Ол жырға қазақтың бір туар композиторы Тұрсынғазы Рахимов ән де жазған. Халық әндері -“Қалқа”, “Сәулем-ай”, “Айналайын” сынды қазақ аруларына арналып айтылған тамаша әндер жетерлік.
PS. Қарындастарын тек маңдайдан ғана иіскеп, қамқор болатын ағалар аман болсын, қазақ арулары алдымен арын ойлайтын заман болсын.
