Геннадий Головкин (8 сәуір 1982 жыл Қарағанды, Қазақстан) — қазақстандық кәсіпқой боксшы, орта салмақта өнер көрсетеді. Орта салмақтағы әлем чемпионы (IBO тұжырымы, 2010 – қ.у; WBA тұжырымы, 2011 – қ.у; уақытша WBC, 2014 – қ.у). The Ring журналына сәйкес P4P салмақ дәрежесіне қарамастан үздік боксшылардың ондығына кіреді. 2013 жылдың соңында WBA тұжырымы бойынша орта салмақ дәрежесіндегі қазақстандық суперчемпион Геннадий Головкин беделді американдық USA Today басылымының нұсқасы бойынша «Жыл боксшысы» атанған болатын.
Әкесі – орыс, анасының ұлты – кәріс, химиялық зертханада көмекші қызметін атқарған. Десе де, елбасымен кездескен бір шарада “Мен – қазақпын!” деп жар салғаны бәріміздің есімізде. Сол кезде елжіремеген жүрек, жасқа малынбаған жанар қалмады. Қазіргі таңда кейбір қазақтың өзі осы сөзді айтуға намыстанады. Осынау ұлы сөздің артында батыр бабалардың рухы жатыр.
Әрине, мәселе “ұлтында” емес, ұлтын сүйген жүрегінде! Сондықтан болар, Алаш жұрты сары қазақтың әр жеңісіне шын көңілмен қуанады. Тамсанады. Әрдайым тілекші болады.
Күн шапағы шашырап, таңсәріде алты Алашты сары қазақ жеңісімен оятады. Лайым солай болсын!
Әлқисса:
Жиырмасыншы ғасырда Міржақып оятып кеткен қазақты енді ешкім де ұйықтата алмас.
Сөзімді Серік Ақсұңқарұлының арнауымен аяқтауды жөн көрдім.
Сенің тұла бойыңдағы өршіген өрлікті,
Ерлікті
Мен ғана түсінем:
Екеуміз Майқұдықтан шыққанбыз,–
ГУЛАГ-тың ішінен,
КАРЛАГ-тың ішінен!
Түсінем…
Біздегі ыза-кек мұнда емес,–аржақта;
Орыстар өксіген,
Кәрістер өксіген,
Қазақтар өксіген КАРЛАГ-та!
Хомо Сапинестен—
Совето Сапиенске дейін шолып ем,
Адамзат жүрмеді Алланың жолымен.
Шеріңді сен сыртқа жұдырықпен шығарсаң,
Өлеңмен шығардым оны мен!
Шаршап та, шалдығып,
Таяқ жеп,
Мың арып,
Білекті сыбанып,
Жүректі ұлы ұлттық рухқа суғарып;
Сойғанмын мен-дағы зұлым мен аярды–
Рингке шығарып!
Сендегі өршіген өрлікті,
Ерлікті
Мен ғана түсінем:
Екеуміз Майқұдықтан шыққанбыз,
ГУЛАГ-тың ішінен,
КАРЛАГ-тың ішінен!
Түсінем…
“Жерұйық” блогері
