Күлімдеп кірген көктем баянауылдықтар үшін барынша жайлы болмады. Алты ай қыстың азабы кетті ме десек, тосын сыйдың «көкесі» көктемде екен. Еріген қар суы, оған қоса толастамаған жауын жол қатынасын бөгеп, жолдарға айтарлықтай зақым келтіруде. Соның салдарынан жолдар суға толып, аудан тұрғындары қаламен, басқа да ауылдармен қатынаса алмай, қиындықтар көруде. Айталық, Баянауыл-Павлодар бағытындағы автобустар бірінен соң бірі бұзылып, адамдардың ызғырын шығарды. Жеңіл автокөліктердің де жағдайы мәз емес. Асфальт төселмеген, саз балшықпен, қара топырақпен «құралған» жолдар күннің жылынуы есебінен езіліп, еңсемізді тіктей алмай жүрген жайымыз бар.
Аудандық төтенше жағдайлар бөлімі бізді жағдай жақсы деп сендірді. Алайда, кеудемізде күдік басым. Орман Тоқтарұлының мәліметіне сүйенсек, 29-шы наурызда Сәтбаев ауылдық округіне қарасты Теңдік, Қараащы ауылдарына барар жолдарда су басу қаупінің алдын алған. Жол жиектеріне құм толтырылған қаптар мен инертті материалдарды төсеген. Сөйтіп, сай-саладағы сулардың жол жиегіне өту қауіпінің алдын алған. 5 техника тоқтаусыз жұмыстар атқарыпты. Төтенше жағдайдың алдын алу, болдырмау шаралары қарқынды жүргізілді. Бірақ, бұл екі күн бұрынғы жағдай. Ол кезде су трасса деңгейіне жетпеген болатын. Апат тосыннан. «Мың күн сынбас, бір күні сынар шөлмек» деген. Араға күн салмай-ақ, Ұзынбұлақ, Сәтбаев ауылдарының автожолдарын су басып қалды. Төтенше жағдайға ұшыраған көлік жүргізушілері ашынуда. Көліктері қирап, қалаберді лай суды кешіп, саз жолда орнынан қозғала алмай әбден дегбірі қашқан оларға материалдық шығын келтіруде. Кешегі «етігімен су кешкен ерлер» бүгінде көлігімен су басқан жолдармен жүруге һәм жүре алмай, қиындық көруге мәжбүр. Әліптің артын баққан тұрғындар қорқынышы үдемесе, сейілмей тұр.
Бүгінгі күні Ақмектеп, Күркелі, Сәтбаев, Ұзынбұлақ ауылдарына қатынайтын жолдарды су басты. 2015 жылы жөндеуден өткен Жаңатілек ауылына кіре беріс жол толығымен су астында қалды. Апат 29-шы наурызда түнгі сағат 23:00-де орын алған. Сол уақыттан таңғы сағат 4:00 ге дейін «Серпіліс» фронтальді погрузчик техникасымен су қаупі төнген үйлердің маңындағы су ағар жолдар ашылып, кеңейтілді. Оған 74-тен астам ауыл тұрғындары көмекке шығып судың жолдарын бөгеді. 30-шы наурыз күні сағат 8:00-ден бастап ауылды су басу қаупінің алдын алу шаралары басталды. Ауылдың үйлеріне, қораларына су кірген жоқ. Жаңатілек-Қарашат бағытындағы ауылдан 7 км арақашықтықтағы жолды су басу қаупі төнгендіктен, бүгінше тас жолы жабық. Суды бөгеу мақсатында 3 камаз жүк көлігі, 1 фронтальды погрузчик, 12 жеңіл көлік, 67 мекеме жұмыскерлері мен ауыл тұрғындары инертті материалдарды дайындауға жұмысқа жұмылдырылды. Инертті материалдар саны 560 қап құм дайындалды. Қазіргі уақытта жұмыс жалғастырылуда. Осы сияқты апаттың алдын алу жұмыстары барлық ауылдарда жүргізіліп жатыр. Ауыл тұрғындары суағарларды қолдарынан келгенше аршып, еріген қар суының үйлерді басып қалмауы жолында білек сыбана жұмыстар атқаруда. Ал, Торайғыр ауылдық округіне қарасты Александровка ауылының қатынас жолындағы көпірді, Жаңажол-Ескелді автожолындағы өткелді су шайып кетіпті. Тізе берсе, шыға беретін апаттық жағдайлар жан түршіктіреді. Оған қоса, жаңбыр мен қардың кезектесіп жауып, жел тұруы жығылған үстіне жұдырық болуда. Аудандық төтенше жағдайлар, коммуналдық шаруашылығы, жолаушылар көлігі және автомобиль жолдары бөлімі тосыннан болған апаттық жағдайды жан-жақты қарастырып, мәселенің оңтайлы шешімін табу жолында қызмет атқаруда. Барлық ауылдық округ әкімшіліктерінде кезекшілік ұйымдастырылылған. Су басу қаупі төнген жағдайда тұрғындарды эвакуациялау орындары да дайын. Апатқа сақадай сай тұрған тұрғындар үшін ол төтенше жағдайдың орын алмауы маңыздырақ.
Әлия ТАУКЕНОВА,
Баянауыл.
