70-ші Кан фестивалі аясында Қазақстанның ұлттық павильоны ашылады. Бұл туралы Орталық коммуникациялар қызметінің апталық брифингі аясында ОКҚ ресми өкілі Оксана Лоскутова хабарлады.
«Канда Қазақстанның ұлттық павильоны ашылады. 17-28 мамыр аралығында өтетін 70-ші Кан фестивалінде алғаш рет отандық киноиндустрияның өнімдері ұсынылатын болады. Сондай-ақ, 19 мамыр күні павильонның ашылуы қарсаңында ресми қабылдаулар мен концерттер өтеді. Аталған шараға елімізге белгілі жұлдыздар Айман Мұсаходжаева, Димаш Құдайберген қатысып, өз өнерлерін көрсетеді»,-деді Оксана Лоскутова.
Спикердің айтуынша, 19-21 мамыр аралығында қазақстандық делегация Минск қаласында 8-ші MILEX-2017 қару-жарақ пен әскери техникалардың халықаралық көрмесіне қатысады.
