Ұлы Жеңіс күніне орай аудан әкімі «Нұр Отан» партиясы Баянауыл аудандық филиалының төрағасы Оразгелді Әліғазыұлы, төрағаның бірінші орынбасары Рауан Қайыпханұлы және аудандық қорғаныс істері бөлімінің басшысы Мұрат Айғазинов ардагерлерді құттықтап арнайы барды. Ең алдымен, 96 жастағы Жұмабек Тоқбаевтың шаңырағында болып, сый-құрмет көрсетті.
Аудан әкімі Жұмабек Тоқбаев аманат еткен ата-баба ерлігіне кейінгі ұрпақ мәңгі қарыздар екендігін айтып, Жеңісті жақындатуда майдан даласында кеудесін оққа тосып, Отан үшін от кешкен ардагерге ұзақ ғұмыр тіледі. Сондай-ақ, премьер-министр Б.Сағынтаевтың арнайы хатын оқып, табыс етті. Өз кезегінде Р.Жантелиев «Нұр Отан» партиясы төрағасының бірінші орынбасары Мұхтар Абрарұлының құттықтау хатын оқып, сыйлығын табыс етті. Ардагер майдан шебіндегі қанқұйлы зұлмат заманды еске алып, бүгінгі бейбіт күнге шүкіршілік етті. Бүгінде майдангер атамыз немере-шөбересінің ортасында ғұмыр кешуде. Көңілі бір жасап қалған қария «Тәуелсіздікті қадірлеп, қастерлей біліңдер. Тәуелсіздігіміз тұғырлы болсын», – деген тілегін, ақ батасын жеткізді.
Содан соң аудан әкімі бастаған топ Жеңісті жақындатқан жауынгер Мағаз Бірімжановтың шаңырағына ат басын тіреді. 93 жасқа келген ардагер келген қонақтарды ұрпақтарымен бірге кең дастархан жайып қарсы алды. Бұл ардагерге де премьер-министр Б.Сағынтаевтың, «Нұр Отан» партиясы төрағасының бірінші орынбасары Мұхтар Абрарұлының құттықтау хаты, сыйлықтары табыс етілді. Сондай-ақ, «Майкубен-Вест» ЖШС-нің өкілдері келіп, 150 мың теңге қаржылай сыйақы беріп, қандай көмек керек болса да, қол ұшын созуға дайын екендіктерін білдірді. Мағаз Бірімжанов аудан әкімімен жақын сұхбаттасып, үлкен философиялық ойды білдірді. Жақсы мен жаман, қымбат пен арзан деген не деген астарлы сауал тастап, жауабын күтті. Ардагердің астарлы сөзіне аудан әкімі орынды жауап қайтара білді. Ардагердің «қымбат деген не?» деген сауалына қайтарған жауабы көңілге қонды. «Бүгінгінің қымбаты ертен арзан болуы мүмкін. Кез келген нәрсенің құнын дәл қазіргі уақытта бағаласақ, сол кезде құнды, сол кезде қымбат болады. Бүгінде бізге, ардагерлеріміз, Сіздер қымбатсыздар!», – деп жауап қатты. Жеңіс үшін жан беруге әзір болып, от кешкен Мағаз Бірімжанов: «Мені және жұбайымды «Нұр Отан» партиясының қатарына қосыңдар. Мен Елбасының саясатын қолдаймын. Бүгінгі бейбіт өмірді бағалаймын. Партия саясатына мен де араласқым келеді», – деп нағыз патриоттық ниетін білдірді.
Ерлік ұмытылмай, ұлықталуы қажет! Отан үшін от кешкен есіл ерлердің бейбіт күн үшін төккен қан мен тері ұрпаққа ұлағат.
Әлия ТАУКЕНОВА.
