Алмас Ахметбекұлы Ақжардағы Мақта ана мен Бәйжігіт баба ескерткіші жанында ақжаулықты аналармен бірге
Аудан орталығындағы Ақсуаттағы ел анасы – Мұрын ана ескерткіші
Ойшіліктегі хан Тоғас ескерткіші
хан Тоғас ескерткіші жанындағы батыр баба ұрпақтары
Ораза айттың алғашқы екі күнінде Тарбағатай ауданы айшықты оқиғаларға толы болды. Атап айтқанда, Ақжарда жаңадан саябақ ашылып, онда Мақта апа мен баласы Байжігіт бабаға, Ақсуаттан да жаңа саябақ ашылып, мұнда Мұрын анаға және Ойшілікте хан Тоғасқа еңселі ескерткіштер ашылды. Тарбағатай ауданы әкімі Д.Оразбаевтың қатысуымен аталмыш ұлы тұлғаларымыздың тарих сахнасынан алар орны, қайраткерлік істері туралы тарихшылар, ақын-жазушылар мен қоғам қайраткерлерінің басын қосқан ауқымды танымдық конференциялар өткізілді. Мазмұнды баяндамалар оқылды, ой-пікірлер ортаға салынды, кестелі өлең-жырдың тиегі ағытылды. Мұның барлығы аудан халқының санасына рухани сілкініс әкелді десек, артық айтқандық емес.
Бұл ел Тәуелсіздігінің 25 жылдығы, елордамыздың туған күнімен тұспа-тұс келген ерекше оқиға болды. Осы тұрғыдан алғанда, ұлы тұлғаларымызды ұлықтап, оларға ескерткіштер тұрғызылуы дер кезінде қолға алынған іс екендігі анық. Өткенде қазақ күресінен осы ауданда Ырғызбай әулиенің атына өткізілген халықаралық жарысты мұқым ел біледі. Бұл жолғы игі шаралар да жоғары деңгейде ұйымдастырылды. Алыс-жақыннан елімізге елеулі ағайындар келіп, тарбағатайлықтармен бірге осынау қуанышты сәттерді бөлісті. Аудан халқы рухани Тәуелсіздіктің тәтті дәмін айқын сезінді.
«Облыс әкімі Даниал Кенжетайұлының ауылдық жерлерді көркейту, абаттандыру туралы тапсырмасы бар. Осыған сәйкес, аудан бойынша ауқымды жұмыстар да атқарылғандығына куә болып қайттық. “Балалар ойнайтын алаңдар, саябақтар, су бұрқақтар салынуда. Мінеки, Ақсуат пен Ақжардан жаңадан демалыс саябағын ашып жатырмыз. Ұлыларымызға құрмет көрсетіп, Мақта апа-Байжігіт баба, Мұрын ана, хан Тоғасқа араналған ескерткіштер бой көтерді. Мұның барлығы аудан халқының келешегі үшін жасалып жатқан дүниелер. Бұл жалғыз менің ғана емес, басшылық құрамдағы команданың жүйелі жұмысының нәтижесі»,- деді аудан әкімі Д.Оразбаев салтанатты шара барысында.
Сонымен қатар, дүбірлі жиынға арнайы келген қонақтар – жазушы-журналист, «Алаш» сыйлығының лауреаты Мархабат Байғұт, әр ауыл туралы ерекше тебіреніп жазған ақын Әбубәкір Қайран, Дүниежүзі қазақтары қауымдастығының оңтүстік аймақ бойынша төрағасы, профессор Жарқынбек Төлтебай, көптеген халықаралық, республикалық мүшәйралардың жеңімпазы, ақын Бақытжан Алдияр, «Байжігіт» әнінің авторы, әнші Нышан Төлегеновтар оңтүстіктің ыстық сәлемін жеткізіп, ақжарма тілектерін айтты.
Сондай-ақ, «Көк тудың желбірегені» әнінің сөзін жазған белгілі ақын Алмас Ахметбекұлы, ғалым Махмұт Түйебаев, ҚР мәдениет қайраткері, журналист Сайраш Әбішқызы, мүсіншілер Әлібек Шоқанов, Болат Кәрібаев, тарихшы Мұхтарбек Кәрімов, СММУ ректоры, профессор Төлебай Рахыпбеков, «Құрмет» орденінің иегері Түсіпхан Түсіпбеков, Тарбағатай ауданының «Құрметті азаматы» Бақыт Қажыбаев, білім беру ісінің үздігі, экономика ғылымдарының докторы Нәдірбек Абсалямов, танымал суретші Еркін Нұразхан және тағы басқа тұлғалар ұлы аналарымызға, батырларымызға ашылған ескерткіштердің мән-маңызына тоқталып, құттықтау лебіздерін білдірді.
«Қазақстанның шығыс өңірі талай талас-тартысты, қиян-кескі шайқастарды басынан өткерген мекен. «Жау жағадан алғанда, бөрі етектен» болған заманда бұл өлкедегі халықты Алтайдың, Тарбағатайдың кемерінен асырмай ұстап қалған осынау біздің ата-бабаларымыз, солардың жанкешті ерлігі. Керемет даңқпен, керемет мақтанышпен айтуға болады. Бүгінгі мынау ұлы тұлғаларымызға ескерткіштердің ашылуы бұл ұлттың оянуы. Мәселен, Мұрын анамызға қойылған ескерткішті қазақ қыздарының тәрбиесіне қойылған символ деп білемін. Гендерлік саясат деп ұрандаған кейбір елдер ананы сыйлауды, қыз баланы қадірлеуді қажет болса бізден үйренсін. «Ер бала туса ұл бала туды дейтін, қыз бала туса нұр бала туды» дейтін халықпыз. «Елжіреген жүзінен көрінетін, еміренген жүрегі бала деген» аналар қашанда құрметті. Сондықтан, Мұрын, Мақта сияқты аналарымызды қалай әспеттесек те жарасады»,- деді Алмас Ахметбекұлы ағынан жарылып. Расында, алып та, батыр да, ақын да анадан туады емес пе! Отбасының ғана емес, бүкіл рулы елге ана бола білген Мұрын, Мақта анамыз бен батыр Тоғас бабамыздың рухын асқақтатқан ұрпағының атқарған ісі көпке өнеге боларлықтай.
“Жерұйық” порталы