Мемлекет басшысы Нұрсұлтан Назарбаев «Б.Ә.Сағынтаевты Қазақстан Республикасының Премьер-Министрі қызметіне тағайындау туралы» Жарлыққа қол қойды, деп хабарлады Bnews.kz Ақорданың баспасөз қызметіне сілтеме жасап. 

«Бақытжан Әбдірұлы Сағынтаев Қазақстан Республикасының Премьер-Министрі болып тағайындалсын», – делінген Жарлық мәтінінде.

Естеріңізге сала кетейік, кеше ҚР Президентінің Жарлығымен Премьер-Министрдің міндеттерін уақытша атқару Бақытжан Әбдірұлына жүктелген болатын.

Бұрынғы Үкімет басшысы Кәрім Мәсімов ҚР Ұлттық қауіпсіздік комитетінің төрағасы қызметіне тағайындалды.

---

Бақытжан Әбдірұлы Сағынтаев 1963 жылы Жамбыл облысы Талас ауданында дүниеге келген.

•   С.М. Киров атындағы Қазақ мемлекеттік университетінің философия-экономика факультетін бітірген (1985), экономист, саяси экономика пәнінің оқытушысы.
• 1985 жылдан – Алматы халық шаруашылығы институтында саяси экономика кафедрасының оқытушысы.
• 1988 жылдан – С.М. Киров атындағы Қазақ мемлекеттік университетінің әлеуметтану кафедрасында ассистент, аға оқытушы, доцент.
• 1992 жылдан – коммерциялық құрылымдарда басшылық қызметтер атқарған.
• 1998 жылдан – Жамбыл облысы әкімінің орынбасары.
• 1999 жылдан – ҚР Шағын бизнеске қолдау көрсету жөніндегі агенттігі төрағасының орынбасары.
• 2000 жылдан – «Шағын кәсіпкерлікке қолдау көрсету қоры» ЖАҚ басқармасының төрағасы.
• 2001 жылдан – ҚР Табиғи монополияларды реттеу, бәсекелестікті қорғау және шағын бизнеске қолдау көрсету жөніндегі агенттігі төрағасының бірінші орынбасары.
• 2004 жылдан – ҚР Табиғи монополияларды реттеу жөніндегі агенттігінің төрағасы.
• 2007 жылдан – ҚР Премьер-министрі Кеңсесінің жетекшісі.
• 2008 жылдан бері – Павлодар облысының әкімі.
• 20 қаңтар—24 қыркүйек 2012 жыл аралығында — Қазақстан Республикасының экономикалық даму және сауда министрі.
• 2012 Қыркүйек—2012 қаңтар — «Нұр Отан» ХДП-ның төрағасының бірінші орынбасары.
• 16 қаңтар 2012 жылдан бастап жаңадан құрылған Қазақстан Республикасының Өңірлік даму министрі және Қазақстан Республикасы Премьер-Министрдің бірінші орынбасары.
• 2014 жылғы 7 сәуірден Қазақстан Республикасы Премьер-Министрінің бірінші орынбасары.