Жидебай – Аблай ханның сенім артқан жаужүрек батырларының бірі, Аблай ханмен бірге шыққан жорықта Балқаш көлі арқылы өтуге тура келеді. Сонда көл арқылы өтетін жалғыз жолды Жидебай білген екен. Көлдің түбінде тау жотасы болған деседі, егер жоталарды басып өтсе, көл суы тізеге дейін-ақ жетеді. Әскер Балқаштан жауынды түнде өткен еді. Жидебай көлдің ортасына келгенде тоқтап, найзасының ұшын көлдің түбіне қадап, қасындағы жігіттердің біріне найзаның жан-жағын қолмен ұстап көріп, әлдебір нәрсенің бар-жоғын көруді сұрайды. Сөйтсе, Жидебай осыдан 20-30 жыл бұрынөтіп бара жатып, осы жерге пышағын жоғалтып алған екен. Жігіт найза қадалған жердің жан-жағын қолымен сипалап жүріп, пышақты тауып алады.
Жидебайдың алдында әрдайым қызыл түлкі жүреді. Бұл – оның періштесі, әруағы еді. Бірде Абылай Жидебайға: «Маған аруағыңды көрсетші»,-дейді. Жидебай келісіп, Абылайды шыңның басына шақырады. Бұдан соң Абылайға шыңның басында тұра беруін сұрап, өзі таудан түседі. Жидебай таудың етегіне түскен кезде ашық даладан қызыл түлкіні байқайды.Сол кезде кенеттен сары бүркіт пайда болып түлкіге тап береді. Осыдан кейін Жидебай қайта тауға шығып, Абылайдан не көргенін сұрайды. Сол кезде Абылай көргенін айтып береді. Мұны естіген Жидебай: «Қызыл түлкі – менің әруағым, ал сары бүркіт – сенің әруағың. Сенің әруағың менің әруағымнан жоғары екенін көрсетеді» дейді.
Әлеуметтік желіге хабарлау
