Ресейлік және америкалық ғарышкерлерді алып ұшқан “Союз” ғарыш кемесі Халықаралық ғарыш станциясымен (ХҒС) сәтті түйісті деп хабарлады Азаттық радиосы Роскосмос мәліметіне сүйеніп.
Кеме станцияға ресейлік ғарышкер Федор Юрчихин мен америкалық астронавт Джек Фишерді жеткізді. “Союз” он жылдан астам уақыттан бері бірінші рет екі ғарышкермен ұшырылып отыр. Әдетте бұл кемелер ғарышқа үш экипаж мүшесімен ұшатын.
Өткен жылы Ресей енді көбіне ғарышқа бұрынғыдай үш адамды емес, екі адамды алып ұшатынын мәлімдеген. Роскосмос осы жылдың соңы немесе келесі жылдың басында ХҒС-ның Ресейге тиесілі секциясын кеңейту үшін жаңа модуль орнататын тұста станцияны жабдықтау шығындарын азайтуға талпынып жатқанын хабарлады.
Соңғы рет екі ғарышкерден тұраты миссия орбитаға 2003 жылы жіберілген. Юрчихин мен Фишер ХҒС-та бес ай болады. Қазір станцияда Ресей, АҚШ және Францияның үш ғарышкері бар.
